ابڙو اڪيڊمي Abro Academy
2020-07-23
داخلا نمبر 659
عنوان لَنگهو، ڳـهڻـو، اليپت
شاخ پکي
پڙهيو ويو 412
داخلا جو حوالو:
لَنگهو، ڳـهڻـو، اليپت
لَنگهو، ڳـهڻـو، اليپت
50 سينٽي ميٽر جسامت جي هن بدڪ جي نر ماد جي رنگن ۾ فرق ٿئي ٿو. هن جنس جي خاص سڃاڻپ انهن جي وڏي ۽ ويڪري چهنب آهي، جيڪا نر جي ڪاري ۽ ماديءَ جي نارنگي هوندي آهي. نر بدڪ جي سِسي سائي رنگ جي، پيٽ ۽ پاسا اکروٽي ۽ ڇاتي اکروٽي ٿئي ٿي. ڪيپراٽيءَ وٽ ڪن پُڇڙيون ڪاريون ٿين ٿيون. کنڀڙاٽيءَ جي جوڙ وٽ ڊگها کنڀ هيٺ طرف ۽ اڇا ڪارا ٿين ٿا. اڏام دوران اڳيان پر نيرا، اندرين کنڀن جي سفيد پٽي ۽ ثانوي کنڀ چمڪدار ساوا نظر ايندا آهن. اک پيلي ٿئيس ٿي جيڪا مادين ۾ عام طور تي گهري رنگ جي هوندي آهي.
ماديءَ جا کنڀ عام بدڪن وانگر چٽڪمرا ٿين ٿا. ان جي ڊگهي ويڪري چهنب نمايان ٿئي ٿي.ان جي گپراٺي رنگ جي چهنب جا هيٺيان ڪنارا نارنگي ٿين ٿا. اڏامڻ دوران هيءَ جنس نيرڳ(Mallard) جي ڀيٽ ۾ پر تيز ڦڙڪائي ٿي، ۽ اڏامڻ دوران ان جي جسم جو اڳيون حصو ڊگهڙو ۽ پڇ ننڍو ڏسبو آهي. ان جا اڳيان پر نيرانجهڙا سرمائي ٿين ٿا. ۽ پرن تي ڦِٽل چُٽو آهي. ٻچو لڳ ڀڳ ماديءَ جهڙو ٿئي ٿو. هي پکي عام طور خاموش رهندو آهي. مادي مختصر ٽرانڪ جو سلسلو آلاپيندي آهي.
هيءَ جنس پالي به سگهجي ٿي. عام طور جوڙي يا ننڍڙي ولر ۾ نظر ايندي آهي. ترڻ مهل چهنب هيڏانهن هوڏانهن هڻندي غذا ميڙيندي ويندي آهي. غذا ۾ آبي ٻج ۽ ٻي ناميات شامل اٿس. ترڻ دوران منڍي ۽ ڳچي ٻوڙي مختصر يا پوريون ٽٻيون ڏيندي آهي. هي بدڪ ڪڏهن پاڻي جهاڳي به خوراڪ ميڙيندي آهي ۽ ڪڏهن ٽٻي به هڻندي آهي.
مٺي پاڻيءَ جي ڍنڍن، تلائن، کڏن، ۽ درياهن ۾ ڏسبي آهي. ڪي پکي آگسٽ جي مهيني ۾ ئي لڏي ايندا آهن ته وري ڪي جُون تائين اپکنڊ ۾ ڏسبا آهن. سنڌ ۾ سياري جو پکي آهي.